REBU - Budaya Adat Suku Karo

PMS - Rebu salah sada kosakata bas masyarakat kalak karo perlu iperhatiken. Kata Rebu kunen bas kamus Karo Indonesia karya Darwin Prinst maka Rebu enda sada kosa kata sini ertina larangan, pantang, tidak bebas ras sesuatu sini ibatasi. Bas pergaulen sosial itengah tengah masyarakat karo perlu iperhatiken tentang REBU enda. Adi la iperhatiken danci kita terluda entah pe danci dat sanksi sosial. Sanksi sosialna banci bas bentuk ikataken entah pe icakapken jelma sienterem maka kita la lit adatna. Tentu status icakapken jelma sienterem lalit adatna suatu hukumen sosial situhu tuhu mberat... 

Sebab sanksi sibagenda rupana menyangkut harga dirinta itengah tengah kegeluhen. Bas kesempatan enda ateku nuri nuri sitik tentang Rebu enda ngasa litna pemetehku ngenca. Emaka lit kari kekuranganna, ersentabi aku man banta kerina. 

Bagi sieteh maka adat istiadat ibahan masyarakat guna terciptana kegeluhen sosial sini tertib, aman ras mehamat rikutken mehaga. Emaka proses terbentukna adat istiadat enda melalui proses kegeluhen sini ialami sada suku entah pe sekelompok masyarakat. 

Erkiteken sie maka situhuna adat istiadat bersifat dinamis, ertina bersifat berubah dari masa ke masa. Tentu saja perubahen enda lit bersifat cepat tapi lit ka sibersifat lambat. Bahkan lit ka sibersifat abadi, secara nilai sajalah gia. 

Bas peradaten kehidupen ilingkungen kalak karo lit sada peradaten sini igelari alu kata REBU. Rebu sini ertina pantang bas erbagai bagai pergaulen sehari hari. Rebu enda bentuk ras derajatna erbagai bagai ras labo ka seri setiap wilayah kalak karo bahkan antar desa pe banci saja erbeda. 

Tapi bas kerina wilayah kalak karo tentang rebu permain ras ajintana, rebu erturangku maka kerina daerah seri ndalanken rebu sienda. Terjadina rebu bas budaya masyarakat karo labo lit secara jelas kal uga maka banci rebu. 

Bage gia adi sinen bas konteks uga mbarenda kegeluhen bersama masyarakat karo maka patut diduga penyebab utama lit ibahan REBU guna menghindari terjadina perbuaten asusila antar si rebu e. 

Sini kuetehna enda ngenca dasar sikuat maka dungna enggo lit ibahan aturen aturen rebu bas peradaten enggeluh sehari hari itengah tengah masyakarat karo. Sebagai gambaren nai masyarakat karo enggeluh bas rumah si 8 jabu entah pe si 4 jabu. 

Banci sibayangken bas sada rumah lit 4 jabu entah pe 8 jabu. Rumah tentu enggo sempit ras rumah labo lit kamar kamarna. Bicara pe lit maka kamar orangtua nge ngenca lit ras e pe sifatna cucuk cabut. Ertina iban bagi kire kire ras enggo medak erpagi pagi maka kamar tidur darurat ndai igulung ka mulihi. 

Situasi bagenda rupana maka reh me ibahan aturan pola interaksi sesama anggota keluarga gelah ula terjadi asusila. Enggo pe dungna rumah mbue sada sada tapi umumna sada kamar tidur ngenca ras e pe guna man orang tua saja. Erkiteken sie mbue rebu bas anggota keluarga enda. 

Rebu sipertama emkap rebu singuda nguda ras anak perana la danci medem i rumahna sendiri. Erkiteken sie maka anak perana medem i jambur entah pe i rumah orangtua tertentu secara berkelompok. Bage pe singuda nguda medem i rumah orangtua tertentu sini biasana janda alu secara berkelompok. 

Rebu peduaken emkap sekalak perbapaan la banci i rumah adi anakna singuda nguda ngenca i rumah. Adi idahna anakna singuda nguda ngenca i rumah maka biasana sekalak perbapaan mulihi ia ku kede kopi entah pe ku ingan sideban. 

Rebu peteluken, sekalak anak perana la banci ku rumah adi turangna singuda nguda ngenca i rumah. 

Rebu peempatken, sekalak perbapaan ras anakna singuda nguda, lalit ikut sideban maka la danci ras erdalan ku juma entah ku sabah bage pe ras erdahin ras ras i juma entah pe isabah. Tambah sie rebu ka nge anak perana ras turangna singuda nguda adi lalit temanna sideban erdalan ku juma entah pe ku sabah ras erdahin ras turangna e. 

Rebu pelimaken, antara bapa ras anakna singuda nguda ras bage pe antara anak perana ras turangna singuda nguda pantang ercakap cakap akrab. 

Rebu peenemken, la banci erkuan ras mamina nande kemberahenna. Tapi gundari i daerah tertentu enggo mulai danci ngerana langsung antara mami ras kela tapi labo sanci cakap akrab. 

Rebu erturangku ras rebu permain ras ajintana, em sipaling populer ras umumnya tiap daerah kalak karo ngelakoken rebu sibagenda rupana. 

Rebu permain ras ajintana berarti la banci ngerana langsung sekalak diberu ras bengkilana emkap bapa dilakina. Pada hal mungkin saja permainna enda sope langa erjabu ras anakna danci nge biasa ercakap erkanam.kanam. tapi enca enggo jadi permenna kal maka lanai danci ercakap. 

Adi ngerana bas keadaan terpaksa harus erkelang kelang. Misalna ooo raga katakan sitik man bengkila ena, enggo nge ia man. Adi erkelang kelang arah jelma pe danci, misalnya o bibi katakan sitik man Bengkila ena, nakan enggo tasak. 

Tentu jadi kaku kal hubungen komunikasi antara bengkila ras permenna enda. I taneh perantauan enggo lit kuidah sipurkanen nge ia antara bengkila ras permenna enda. Tapi enda sifatna sangat personal labo gejala umum. 

Adi ipikirken kal secara mendalam adi sekedar sipurkanen saja labo kuakap nyalahi norma kehamaten. Tapi tentu ngerana bas perluna saja ras ula cakap cakap keakraban. Bage gia adi ilebe lebe jelma sienterem labo denga kuakap danci iterima jelma sienterem. 

Rebu erturangku em sada rebu sini kuakap perlu ilestariken guna tetap terjaga kehamaten kedua belah pihak. Rebu erturangku emkap la danci sipurkanen antara sekalak dilaki ras kemberahen silihna kal. 

Dua duana berasal bas luar keluarga inti emaka adi sinen bas konteks masyarakat karo masa lampau sini umumna erjabu ras sada kuta entah pe kuta kuta sekitar maka danci ipastiken antara sierturangku enda enggo sitandaan sope langa tumbuk erdemu bayu ras perbulangenna adi sidiberu, adi sidilaki ras kemberahenna. 

Emaka danci saja antar erturangku enda pernah danci erteman teman entah pe pernah lit ukurna masing masing. Emaka danci sibayangken kai simungkin terjadi adi ia danci ngerana ngerana ras turangkuna. 

Selain sie Rebu Permain Bengkila ras rebu erturangku bagi kalak si i luar kalak karo tentu heran uga maka lanai danci ngerana enca jadi keluarga inti. Bagi kalak sila kalak karo erjabu ras kalak karo pe enggo pasti awalna tersungkun sungkun ujurna uga maka la danci sipurkanen ras bengkilana. Pada hal ningen rusur adi mertua seri nge ras orangtuanta sendiri. Ersentabi ras bujur.
 
Penulis : Jarto Tarigan Pekan
Dikutip dari : https://karofoundation.org/